Vieiras da Ría de Arousa en prebe mariñeiro

Descripción

A vieira é, quizais, o molusco bivalvo máis famoso de Galicia, non só pola exquisitez da súa carne, senón tamén pola asociación histórica da súa cuncha co símbolo do Camiño de Santiago e o Xacobeo.

A súa extracción está rigorosamente regulada. A frota dos portos arousáns de Cambados, O Grove, Rianxo, Ribeira e A Pobra sae a faenar en períodos curtos de tempo, normalmente de novembro a marzo, utilizando a arte de pesca tradicional denominada rastro da vieira. A descarga do marisco realízase na lonxa de Cambados, onde unha empresa autorizada realiza a súa depuración e posterior eviscerado. Tanto as zonas de captura como a arte de pesca, o período de extracción e os procesos de depuración están avalados polo selo de calidade PescadeRías.

BOU DE VARA elabora a vieira en fresco, logo dun proceso de cocción estritamente controlado para manter a súa textura e sabor xenuínos. O envasado efectúase ao xeito tradicional, peza a peza, por mans expertas. Do mar á lata en cuestión de horas, para preservar todas as súas cualidades coa máxima frescura. Preparada en tradicional prebe mariñeiro, a base de cebola, tomate, loureiro, vinagre e aceite de oliva virxe extra. Para desfrutar con todos os sentidos, gozando coa vista nada máis abrir a lata, ata apreciar as súas cualidades no padal. Un manxar gastronómico que marida á perfección con viños brancos secos envellecidos.